Sindroma e Vezoreve Polikistike (PCOS) është një çrregullim hormonal i shpeshtë tek femrat në moshën riprodhuese. Karakterizohet nga cikle menstruale të çrregullta, të rralla ose të munguara, si dhe nivele të larta të hormoneve mashkullore (androgjenëve).

PCOS ndodh kur vezoret e femrave krijohen me shumë qeska të vogla të mbushura me likid, të vendosura kryesisht në shtresën periferike të tyre, të quajtura mikrokista. Prezenca e tyre shkakton çrregullime të ciklit menstrual dhe në disa raste edhe mungesë të ovulacionit.

Shkaqet e PCOS mbeten ende të panjohura, por faktorë të tjerë që ndikojnë përfshijnë nivelet e shtuara të insulinës, inflamacioni i shkallës së ulët, trashëgimia, dhe nivelet e larta të androgjenëve.

Simptomat e PCOS ndryshojnë nga një paciente te tjetra, por disa shenja të zakonshme përfshijnë:

1. Ҫrregullime të ciklit menstrual – cikli menstrual i rrallë, i çrregullt apo i zgjatur në kohë (jo çdo muaj).
2. Nivele të larta të androgjenëve – shtim i qimeve në fytyrë dhe trup (hirsutizëm) dhe akne.
3. Vezore polikistike – vezore me volum më të madh se norma dhe që përmbajnë shumë mikrokista të vegjël.

Në rastet e dyshimta të PCOS, është e rëndësishme të konsultoheni me mjekun specialist gjinekolog. Diagnoza e hershme dhe trajtimi në kohë, shoqëruar me një dietë të shëndetshme dhe aktivitet fizik, mund të ndihmojnë në përmirësimin e shëndetit dhe uljen e rrezikut të komplikacioneve afatgjata, si diabeti i tipit 2 dhe sëmundjet kardiovaskulare.

Trajtimi i PCOS bazohet në qëllimet e secilit pacient. Mund të përfshijë ndryshime të stilit të jetesës, trajtim hormonal dhe medikamente të tjera që ndihmojnë në stabilizimin e ciklit menstrual, përmirësimin e infertilitetit dhe minizimin e simptomave të tjera.