PAP testi dhe eko gjinekologjike: dy hapa të rëndësishëm për parandalimin e kancerit

Kanceri i qafës së mitrës është ndër kancerët më të shpeshtë tek femrat, por është edhe një nga më të parandalueshmit nëse ndryshimet zbulohen herët. Dy ekzaminimet më të rëndësishme për këtë qëllim janë PAP testi dhe eko gjinekologjike.

Çfarë është PAP testi?

PAP testi identifikon ndryshime në qelizat e qafës së mitrës përpara se ato të shndërrohen në kancer. Gjatë ekzaminimit, mjekja merr me një furçë të vogël një mostër qelizash nga qafa e mitrës. Procedura zgjat pak minuta dhe zakonisht nuk dhemb, por mund të shkaktojë shqetësim të lehtë.

Shumica e rasteve të kancerit të qafës së mitrës lidhen me infeksionin e vazhdueshëm me disa lloje të virusit HPV. PAP testi, i kombinuar sipas rastit me testin për HPV, lejon zbulimin dhe trajtimin e ndryshimeve shumë përpara se të bëhen të rrezikshme.

Çfarë tregon eko gjinekologjike?

Ekografia gjinekologjike vlerëson mitrën, vezoret dhe strukturat përreth. Ajo ndihmon në zbulimin e fibromave, kisteve të vezoreve, ndryshimeve të endometrit dhe shkaqeve të dhimbjeve ose të cikleve të çrregullta. Është pa dhimbje dhe pa rrezatim.

Kur dhe sa shpesh bëhet PAP testi?

Rekomandohet që femrat ta fillojnë PAP testin rreth moshës 21 vjeç dhe ta përsërisin rregullisht – zakonisht çdo 1 deri 3 vjet, sipas moshës, rezultateve të mëparshme dhe këshillës së mjekes gjinekologe – edhe kur nuk kanë simptoma. Kontrolli gjinekologjik me ekografi zakonisht bëhet një herë në vit.

Si të përgatiteni për PAP testin

• Mos e planifikoni gjatë menstruacioneve;
• 48 orë para testit shmangni marrëdhëniet seksuale, dushet vaginale dhe kremrat ose ovulat vaginale;
• Tregojini mjekes nëse jeni shtatzënë ose keni pasur rezultate jonormale më parë.

Kur të konsultoheni me gjinekologen pa pritur

Nëse keni gjakderdhje jashtë ciklit ose pas marrëdhënieve, dhimbje në pjesën e poshtme të barkut ose sekrecione të pazakonta, mos prisni kontrollin vjetor.

Në Dr. Medical Clinic & Lab

PAP testi dhe eko gjinekologjike janë pjesë e kontrollit gjinekologjik në klinikën tonë. Lexoni më shumë te Gjinekologji në Tiranë ose shikoni Paketat 2026.